"Özünü tanı, cəmiyyətə dəyər qat” layihəsi çərçivəsində milli-mənəvi dəyərlərə həsr olunan film nümayişi keçirilib
Elm və Təhsil Nazirliyinin Təhsildə qrantlar müsabiqəsi çərçivəsində icra olunan “Özünü tanı, cəmiyyətə dəyər qat” layihəsi çərçivəsində şagirdlərin milli-mənəvi dəyərlər ruhunda tərbiyəsinə xidmət edən növbəti maarifləndirici fəaliyyət təşkil olunub.
Bu dəfə layihə iştirakçıları üçün şəhidlərimizin xatirəsinə həsr edilmiş sənədli filmlərin nümayişi keçirilib.Tədbir çərçivəsində məktəbin məzunu, Təhsil TV əməkdaşı və layihənin videoqrafı Emil Şükürov tərəfindən hazırlanmış Şəhid Oruc Nəcəfli haqqında sənədli film şagirdlərə təqdim olunub. Film qəhrəmanlıq salnaməsi yazmış şəhidimizin həyat yolu, döyüş fəaliyyəti və Vətən uğrunda göstərdiyi fədakarlıq barədə geniş məlumat verərək iştirakçılar tərəfindən dərin maraq və duyğularla qarşılanıb.
Eyni zamanda, tədbir çərçivəsində digər bir sənədli ekran işi – Şəhid Hüseyn Abbasova həsr olunmuş film də nümayiş etdirilib. Yenə də videoqraf Emil Şükürov tərəfindən hazırlanan bu film şəhidin həyat hekayəsini, onun vətənpərvərlik ruhunu və göstərdiyi igidliyi əks etdirərək şagirdlərdə milli qürur və vətənə bağlılıq hisslərini daha da gücləndirib. Film nümayişindən sonra şagirdlərlə müzakirə sessiyası təşkil olunub. Müzakirələr zamanı iştirakçılar izlədikləri filmlər barədə fikirlərini bölüşərək vətənpərvərlik, qəhrəmanlıq, milli kimlik və mənəvi dəyərlər haqqında düşüncələrini ifadə ediblər. Bu proses onların analitik düşünmə və emosional dərk bacarıqlarının inkişafına müsbət təsir göstərib. Qeyd edək ki, layihə çərçivəsində keçirilən bu kimi fəaliyyətlər şagirdlərin tarixi yaddaşının möhkəmləndirilməsinə, milli-mənəvi dəyərlərə bağlılığının artırılmasına və vətənpərvər ruhda formalaşmasına mühüm töhfə verir.Ümumilikdə, təşkil olunan film nümayişi layihənin məqsədlərinə uyğun olaraq gənclərin təkcə intellektual deyil, həm də mənəvi inkişafını təmin edən təsirli və yadda qalan tədbirlərdən biri kimi qiymətləndirilib.
