Günboyu.az xəbər verir ki, Mingəçevir Gənclər Evində təqdim olunan “Qəfəs” tamaşası narkomaniyanın insan həyatında yaratdığı ağır fəsadları, mənəvi sarsıntıları və ailə-cəmiyyət münasibətlərində doğurduğu faciələri təsirli səhnə dili ilə tamaşaçılara çatdırıb. Tamaşada “qəfəs” obrazı insanın yanlış seçimlər nəticəsində düşdüyü mənəvi əsarətin, asılılığın və çıxış yolu axtaran ruh halının simvolu kimi təqdim olunub.
“Azərbaycan müəllimi” olaraq biz də tamaşada iştirak etdik və səhnədən verilən sosial mesajın tamaşaçılar üzərində yaratdığı təsiri müşahidə etdik. Ən mühüm məqamlardan biri bu idi ki, tamaşa peşəkar səhnə adamlarının deyil, məhz gənclərin, Mingəçevir Gənclər Evinin könüllülərinin iştirakı ilə ərsəyə gətirilmişdi. Bu isə təqdim olunan mövzunun təsir gücünü daha da artırırdı. Çünki gənclər bu dəfə yalnız tamaşaçı deyildilər, onlar cəmiyyətə söz deyən, yaşıdlarına xəbərdarlıq edən, sağlam gələcək naminə səhnədən çağırış ünvanlayan tərəf idilər.
Müəllifi Gülşən Qafarlı olan tamaşanın quruluşçu rejissorları Elçin Məhərrəm və Cavidan Abdullayevdir. Tamaşanın yaradıcı heyəti “Azərbaycan müəllimi” ilə fikirlərini bölüşərək bildiriblər ki, əsas məqsəd narkomaniyanın yalnız fərdi problem olmadığını, onun ailəyə, dost çevrəsinə, təhsilə, insanın gələcək arzularına və bütövlükdə cəmiyyətə vurduğu zərəri göstərmək olub.
Tamaşanın müəllifi Gülşən Qafarlı qeyd edib ki, “Qəfəs”i yazarkən əsas məqsəd tamaşaçını sadəcə kədərləndirmək deyil, onu düşündürmək olub: “Biz göstərmək istədik ki, narkotik insanın həyatına birdən-birə daxil olub onu məhv etmir. Bu, çox zaman kiçik səhv seçimlərdən, laqeydlikdən, yanlış çevrədən başlayır. İnsan bir də görür ki, artıq öz həyatının içində görünməz bir qəfəsdədir. Tamaşanın əsas mesajı budur: bu qəfəsə düşməmək üçün gənclər vaxtında doğru seçim etməlidirlər”.
Quruluşçu rejissor Elçin Məhərrəm tamaşanın hazırlanma prosesində gənclərin mövzuya ciddi məsuliyyətlə yanaşdığını bildirib. Onun sözlərinə görə, səhnədə təqdim olunan hər bir epizodun arxasında maarifləndirici məqsəd dayanır: “Biz istədik ki, tamaşa didaktik, quru nəsihət formasında olmasın. Tamaşaçı hadisələri izlədikcə özü nəticə çıxarsın. Gənclər obrazların daxili ağrısını, asılılığın insanı necə dəyişdirdiyini, ailənin necə sarsıldığını tamaşaçıya hiss etdirməyə çalışdılar”.
Quruluşçu rejissor Cavidan Abdullayev isə bildirib ki, tamaşada əsas diqqət insan taleyinə yönəldilib: “Narkomaniya haqqında çox danışılır, amma bəzən rəqəmlər, xəbərdarlıqlar insanlara yetərincə təsir etmir. Səhnə isə başqa gücə malikdir. Burada tamaşaçı həmin ağrını görür, yaşayır, düşünür. Bizim üçün əsas olan gənclərin bu mövzunu anlayaraq oynaması və tamaşaçılara səmimi mesaj ötürməsi idi”.
Mingəçevir Gənclər Evinin könüllüləri də tamaşanın onlar üçün sadəcə səhnə işi olmadığını bildiriblər. Onların sözlərinə görə, “Qəfəs”də rol almaq hər bir gənc üçün həm yaradıcı təcrübə, həm də sosial məsuliyyət nümunəsi olub. Könüllülər qeyd ediblər ki, tamaşa vasitəsilə yaşıdlarına “yanlış seçim həyatın sonu ola bilər, amma doğru seçim gələcəyi xilas edir” mesajını çatdırmaq istəyiblər.
Tamaşanın ümumi ideyası təhsilin və mədəniyyətin birgə gücünü də ön plana çıxarıb. Təhsil gənclərə düzgün düşünmək, seçimlərinin nəticəsini dərk etmək, məsuliyyətli qərar vermək bacarığı qazandırırsa, mədəniyyət bu düşüncəni daha təsirli, emosional və yadda qalan formada təqdim edir. “Qəfəs” tamaşası da məhz bu baxımdan gənclərin maariflənməsində sənətin mühüm vasitə olduğunu göstərib.
Səhnədə təqdim olunan hadisələr bir daha xatırladıb ki, narkomaniya insanı yalnız fiziki baxımdan deyil, mənəvi olaraq da əsir alır. O, insanı ailəsindən, arzularından, təhsilindən, dostlarından və gələcəyə olan inamından uzaqlaşdırır. Lakin tamaşanın verdiyi mesaj yalnız faciə üzərində qurulmayıb. Burada çıxış yolu da göstərilir: maariflənmək, düzgün çevrə seçmək, ailə və cəmiyyət dəstəyinə güvənmək, ən əsası isə təhlükəni vaxtında dərk etmək.
Nəticə olaraq, Mingəçevir Gənclər Evinin könüllüləri tərəfindən təqdim olunan “Qəfəs” tamaşası gənclərin sosial problemlərə biganə qalmadığını, əksinə, cəmiyyət üçün vacib olan mövzulara sənət vasitəsilə münasibət bildirdiyini nümayiş etdirdi. Tamaşa səhnədən verilən sadə, amma güclü bir mesajla yadda qaldı: narkomaniya insanı görünməz qəfəsə sala bilər, lakin maariflənmə, iradə, düzgün seçim və ictimai dəstək bu qəfəsi qırmağın ən təsirli yoludur.