Mingəçevir şəhəri Nizami Gəncəvi adına 8 nömrəli tam orta məktəbdə həyata keçirilən “Yaşıl bağ – aqronomluq bacarıqları” layihəsi çərçivəsində növbəti mərhələ icra olunub. Bu dəfə layihə iştirakçıları şitillik ərazisinin, kompost sahəsinin və ekoloji müşahidə guşəsinin hazırlanması prosesində iştirak ediblər.

Fəaliyyət çərçivəsində ilk olaraq şitillik zonası üçün xüsusi sahə ayrılıb və torpağın hazırlanması işi aparılıb. Bu zonada şagirdlərin gələcək mərhələlərdə toxum səpilməsi, cücərmə prosesinin izlənməsi və şitillərin böyümə mərhələlərinin öyrənilməsi üçün şərait yaradılıb. Şitillik sahəsinin təşkil edilməsi şagirdlərə bitkinin ilkin inkişaf dövrü haqqında praktiki bilik əldə etməyə imkan verəcək.

Daha sonra layihə üzrə kompost sahəsinin yaradılması işi həyata keçirilib. Bu məqsədlə üzvi tullantıların çeşidlənməsi, kompostun tərkibi, çürümə prosesi və təbii gübrə kimi istifadəsi barədə məlumat verilib. Şagirdlər kompost qutularının hazırlanmasında iştirak edərək təbiət dostu gübrələmə üsullarının əhəmiyyətini öyrəniblər.

Layihənin bu mərhələsində əlavə olaraq ekoloji müşahidə guşəsi də qurulub. Bu guşədə şagirdlər bitki boy artımını izləyəcək, torpağın rütubət və işıq göstəricilərini qeydə alacaq və bağ sahəsindəki ekosistemin dəyişikliklərini müşahidə edəcəklər. Müşahidə guşəsi ekoloji tədqiqat bacarıqlarının inkişafına, təbiət hadisələrinin elmi yanaşma ilə öyrənilməsinə xidmət edir.

Bu işlərin görülməsi “Yaşıl bağ – aqronomluq bacarıqları” layihəsinin praktiki mərhələsinin genişləndirilməsinə, şagirdlərin təbiətə yanaşma tərzinin formalaşmasına və onların ekoloji biliklərinin dərinləşməsinə mühüm töhfə verir. Layihənin növbəti mərhələlərində əkin prosesi və bağ sahəsinin abadlaşdırılması üzrə fəaliyyətlərin davam etdirilməsi nəzərdə tutulur.